ПРОГРАМА СРИМСКЕЙ ЛЇСТИНИ

[kiki]

ПРОГРАМА СРИМСКЕЙ ЛЇСТИНИ


   Сримска лїстина ше заклада за два основни политики хтори Национални совит Руснацох будзе мушиц запровадзиц, кед сцеме же би Руснаци надалєй постояли як народ на тим подручу:

1.   рационализация и екомичносц роботи Националного совиту Руснацох и других институцийох чиї снователь Национални совит Руснацох
2.   зоперанє асимилациї

Рационализация и екомочносц роботи Националного совиту Руснацох и других институцийох чиї снователь Национални совит Руснацох

Потребне нам рационалнєйше и економичнєйше трошенє средствох цо доставаю руски институциї, а тоти средства нашо институциї доставаю праве за пестованє рускей националней култури. Причина прецо нашо институциї доставаю средства треба же би була и основа за целисходне трошенє средствох истих институцийох. Або з другима словами, нашо институциї нє шму будз сами себе циль, як цо помали поставаю.
Под рационализцию наших институцийох перше подрозумюєме же ше шедзиско Заводу за културу войводянских Руснацох муши врациц до Руского Керестура. Здогадаме же Национални совит Руснацох у септембру 2007. року, кед ше сновал Завод, принєсол одлуку же шедзиско Заводу у Руским Керестуре и же ма два одзелєня – у Дюрдьове и у Шиду, праве пре капацитети тих двох штредкох. Завод за културу войводянских Руснацох реґистровани у Тарґовинским суду у Зомборе, алє є заш, пре твардоглавосц, нєлеґално у Новим Саду. Значи, Завод ше муши врациц до Руского Керестура, бо там и шедзиско Националного совиту Руснацох и нєт анї єдней рационалней причини пре цо би шедзиско Заводу було у Новим Саду. И то нє шицко, закладаме ше же би Национални совит Руснацох и Завод за културу войводянских Руснацох бул у истим будинку – и то у ''Замку'', бо то найрационалнєйше ришенє, а нє треба забудз анї символику пре карактер и значенє того будинку за Руснацох. Значи, конкретно ше закладаме за шлїдуюце:
- шедзско Заводу ше ма без одкладаня врациц до Руского Керестура ( бо нє сцеме плацац милионски закупнини ), а и Руски Керестур природно центер Руснацох ( а нє Нови Сад, гоч кельо то крашнє випатрало )
- зєдинїц технїчни служби Националного совиту Руснацох и Заводу до єдней, заєднїцкей служби
- без одкладаня формовац одзелєня Заводу у Дюрдьове и Шиду, а у тей хвильки єст капацитету же би ше формовало одзелєнє и у Коцуре
Средства за роботу руских институцийох ушпоруєме и на шлїдуюци способи:
- професийни особи у Националним совиту Руснацох можу будз лєм предсидатель Националного совиту и два фахови сотруднїки – за образованє и за информованє и официйне хаснованє руского язика
– закладаме ше же би Национални совит Руснацох нє мал окремни вивершни орґан, бо роботу вивершного орґану може робиц предсидатель Националного совиту як професийно занята особа; формованє ище и вивершного орґану, коло самого Националного совиту, будзе значиц лєм звекшованє розходох, а ефект нє будзе векши як кед би роботу вивершного орґану робел лєм предсидатель Националного совиту;
- фахови сотруднїк за образованє треба же би активно участвовал у организациї образовно-културних манифестацийох, як цо ''Костельнїкова єшень'', ''Яр Мафтея Виная'', ''Днї Миколи М. Кочиша'', школски литературни стретнуца итд. вєдно зоз локалнима орґанизаторами и Дружтвом за руски язик, литературу и културу, як ношительом активносци; муши провадзиц одвиванє настави на руским язику як у порядней так и у факултативней настави и старац ше же би ше шицки законски можлївосци вихасновали и реаговац кед ше у даєдних штредкох права ощербую; муши активно участвовац у орґанизациї лєтнєй школи руского язика.
- фахови сотруднїк за информованє и официйне хаснованє язика би провадзел информованє на руским язику у шицких наших ( електронских и друкованих ) медийох, од покраїнского по локални уровень; муши активно участвовац у ришованю проблемох у информованю на руским язику, хтори окреме наставаю пре приватизацию медийох; муши провадзиц як ше почитую права Руснацох на официйне хаснованє руского язика, там дзе руски язик у официйним хаснованю.
На тот способ ше ошлєбодза милионски средства хтори буду унапряамени на културни орґанизациї Руснацох и злєпшованє ситуациї у рускей култури.

Завод за културу войводянских Руснацох

Завод муши подполно пременїц способ своєй роботи, бо нє видни ефекти роботи институциї хтора иснує уж три роки. Фахови сотруднїк за културу би бул заняти, нє у Националним совиту, алє у Заводу и окреме би активно участвовал у обдумованю змистох наших културних манифестацийох, як цо ''Червена ружа'', ''Жатва'', ''Най ше нє забудзе'', ''Мелодиї Руского двору'', манифестацийох хтори организую РКПД з Нового Саду, ''Гавриїл Костельнїк'' з Кули, ''Дружтво Руснацох'' зоз Суботици, ''Дружтво Руснацох'' зоз Сримскей Митровици, ''Петро Кузмяк'' з Нового Орахова, КПД ДОК, и други нашо културни дружтва, гоч кельо их єст, бо ше ми закладаме же би ше шицки интереси Руснацох артикуловали прейґ здруженьох и потрумуєме шицки нашо здруженя и будземе ше закладац за интереси шицких здруженьох, бо моцни здруженя зопераю централизацию и монополизацию култури.
Завод ше муши старац о руским народним скарбу, бо є праве прето и формовани, а муши и унапрямовац розвой рускей култури и то прейґ:
- орґанизованя семинара и школи рускей фолклористики
- орґанизованя семинара у театралней творчосци
У Заводу муша будз заступени интереси шицких штредкох у хторих жию Руснаци, бо лєм так будземе роснуц як заєднїца.
Одзелєня Заводу бу помогла у зазберованю народного скарбу зоз свойого штредку.
Одзелєня Заводу и подручни канцелариї Националного совиту би були зєдинєни до заєднїцкей служби, пре економичносц и лєпшу вязу помедзи тоти два институциї.
Завод ше муши старац и помагац Национални оркестер, бо то уж постава институция од окремного значеня за Руснацох.

Цо Национални совит у своїм мандату муши зробиц

Национални совит муши конєчно завжац становиско коло аґониї РНТ ''Дядя'' и вообще коло аматеризма у театралней творчосци, и то так же би почал ришовац, а нє лєм констатовац, проблеми.
Национални совит муши конєчно завжац и становиско коло Спортских бавискох ''Яша Баков'' у смислу же ше Сримска лїстина заклада же би Национални совит финансовал, або у векшей часци финансовал тоти спортски манифестациї, бо спортски бависка ''Яша Баков'' уж маю вельке значенє за Руснацох.
Национални совит муши повязац руских привреднїкох, муши уключиц тих цо продукую до процесу приношеня одлукох, бо привреднїки можу вельо помогнуц и цалому народу и самима себе, а то смисел Националного совиту. Закладаме ше же би ше формовал єден стаємни саям рускей привреди, дзе би ше нашо привреднїки сходзели и на далєй розвивали свою роботу, а з другого боку би нашо привреднїики, прейг окремного фонду, помагали нашей култури.
Национални совит муши, бо Руснаци углавним руралне жительство, помагац вшадзи дзе єст заинтересованих, же би ше нашо парасти здружовали до задругох, бо лєм кед зме здружени можеме ше розвивац. Видзиме же нови тренди у швеце и нашей держави, єдноставно сцераю шицких хтори ше нє прилагодза. Национални совит муши водзиц рахунка и о тим, бо кед ше сами о себе нє будземе старац, нє знаме хот будзе.
Руска национална политика нє шме будз централизована, бо така нїґда нє була и нє у природи є Руснацом. Нєшкайши политични тренди таки же ше процес и право на приношенє одлукох централизує. Сримска лїстина ше проциви централизациї и концентрованю моци, и заклада ше за политични плурализам, децентрализацию одлучованя и розпоредзованє средствох спрам ґеоґрафского и демографского розпорядку руского жительства.

Национални совит Руснацох муши видавац Официйни глашнїк у хторим би ше обовязно обявйовали одлуки Националного совиту и Заводу за културу войводянских Руснацох, бо таки одлуки маю значенє за шицких Руснацох. У тим глашнїку можу и други обявйовац свойо одлуки и то безплатно. Чом важне же би одлуки хтори тоти два институциї приноша були обявйовани у официйним глашнїку? Прето же би шицкима були доступни, прето же за Руснацох маю значенє ''закона'' и Руснаци маю право ше поволовац на шицки одлуки хтори тоти институциї принєшу. На таки способ ше звекша одвичательносц самих институцийох и поєдинцох, хтори треба же би запровадзовали одлуки. Одлука муши будз обявена у правней форми и лєм кед так будземе робиц, нашо институциї
почню робиц за ширши интерес, бо вец кажди може глєдац же би ше було яка одлука и випочитовала, односно випольнєла. Национални совит и Завод нє здруженя гражданох, алє державни институциї и їх робота муши будз явна. А явносц роботи и у официйним обявйованю одлукох.

Зоперанє асимилациї

Асимилация найвекши проблем з хторим ше Руснаци стретаю у новших часох. Дзепоєдни то толкую як природни процес, бо ше єдна мала заєднїца нє може длуго отримац у околїску велького народу. Складаме ше же то може будз фактор, алє нє думаме же то причина. Причина прецо Руснаци траца свой национални идентитет уствари єдноставна, а то нєорганизованосц руских институцийох хтори маю основни задаток же би, нє лєм розвивали руску културу, алє и же би зоперали асимилацию. Асимилация почина гевтого моменту кед ше чловек почнє ганьбиц же цо є по походзеню. То ше скорей случовало лєм у таких штредкох, як цо Срим, дзе Руснаци нє жию у компактней маси, алє розшато, а тераз видзиме же ше помали преноши и ''прейг Дунаю''. Дакеди, док зме були худобни и заварти до єдного, най повеме, свойого штредку, нє було проблеми, алє проблем настал кед зме ше отворели. Вец вибили даскельо основни проблеми: хто Руснаци, дзе їх держава/матична територия, наволайме то як було, цо руска история, цо Руснаци дали цивилизациї и историї. Нашо оцове у своїм часу нє мали одвит на тоти фундаментални питаня єдного народу. А випатра нам же анї терашнї оцове нє думаю дац одвит на тото питанє своїим дзецом. Главне питанє у наступним периоду будзе нє же чи сом Руснак чи дахто други, алє прецо бим я бул Руснак кед можем будз и дахто други, бо тот други ма свою державу, ма своїх националних геройох, ма сой национални мит ( ма аж и свойо национални приповедки ), ма свойо место у историї. Ми як народ нє розришели фундаментални питаня – цо твори руску историю, хтори то руски национални герої ( ту нє думаме на воякох, алє на преднякох ) хто твори тот народ хтори ми наволуєме як Руснаци – Русини. Национални совит муши конєчно превжац важни крочаї, односно вецей ше нє може и нє шме тот проблем заобиходзиц.

Национални совит муши конєчно завжац становиско же цо твори историю руского народу ( нормалне з помоцу фаховцох ) и официйну историю Руснацох положиц до учебнїкох и на руским и на сербским язику, же би наши дзеци конєчно знали хто су ( у историйним смислу ). З другима словами, Руснаци конєчно муша достац официйну историю свойого народу, а шицко друге буду окремни фахово ( або нєфахово роботи ). Єден озбильни народ ( а знаме же Руснаци озбильни народ) муши мац нє лєм кодификовани язик, алє и ''кодификовану историю''.
Национални совит ше муши випрофиловац и на медзинародним планє у смислу же муши постац лидер Руснацох, то єдине политичне цело у буквалним смислу и муши ше так и справовац, а ми маме капацитет за таке дацо. Национални совит Руснацох муши розвиц стратеґию повязованя политичних целох ( хтори у других жемох подобни з нашима националнима совитами ) Руснацох у других жемох, же би акциї у култури, образованю и информованю були синхронизовани и унапрямени на зоперанє асимилациї Руснацох у шицких жемох. Добре же исную полуприватни вязи помедзи рускима орґанизациями, алє то недостаточне и превозидзене у хвильки кед Руснаци у Сербиї маю и одредзени законски инструменти же би запровадзел политични одлуки. Гевто цо по тераз робели руски здруженя у приватней режиї ( у приватней бо нє мали инструментарий запровадзиц одлуки ), муши превжац Национални совит, бо Национални совит єдини леґитимни представнїк Руснацох у держави Сербиї и ма инструментарий запровадзиц одлуки хтори би синхронизовано були прилапени. Руснаци, у своєй политичней историї, тераз виходза зоз приватней сфери, и уходза до политичней, правней и державней сфери и праве тота шанса ше нє шме препущиц. Сримска лїстина ше заклада за орґанизовану, здуману и роздуману стратеґию зопераня асимилациї и розвою нашого народу у цалосци.

Национални совит муши будз мост за повязованє шицких руских културних институциойох до єдного союзу руских здруженьох.

Национални совит муши обеспечиц же би информациї о животу и активносцох Руснацох у швеце були доступни нашим гражданом у Сербиї.

Национални совит ше муши вибориц же би Катедра за руски язик мала таку програму студираня хтора би оможлївела дипломованим професором же би робели вецей роботи, у смислу же би могли преподавац вецей наставни предмети.
Национални совит нє шме дошлєбодзиц гашенє факултативней настави руского язика зоз елементами националней култури.
''Руске слово'' муши мац стаємного дописователя зоз шицких наших штредкох, а окреме муши мац стаємного дописователя зоз Сриму.

Асимилация ше зопре през рационалнєйшу роботу руских институцийох и кед Руснаци похопя же тоти институциї маю смисел праве старац ше о народу, а нє же би сами себе були циль. И зопре ше кед Национални совит конєчно пререже дилеми коло историї и традициї, завежнє ясне становиско, исте положи до официйней настави и кед завежнє ясне становиско на медзинародним планє.

И на концу, ми инсистуєме на поєдинєчней одвичательносци за нєодробену роботу, або за чкодлїво одробену роботу.

                     СРИМСКА ЛЇСТИНА